捨瑞銀就任小額貸款公司 張化橋榮升金融界董座

最近投資銀行興起玩音樂椅，幾間大行之投行部高層都頻頻換人。最新一位就係曾經有「民企之父」稱號的瑞銀中國投資銀行部副主席張化橋【圖】，聽聞Joe已同瑞銀搞清晒手續，今天開始返新工，就任一家廣州小額信貸公司之董事長。

自從中央勒令各大銀行收緊銀根後，全國中小企都幾乎叫晒救命，融資難問題成為全國問題。不過，亦因為向大銀行借錢唔易，反而造就小額借貸公司如雨後春筍般誕生，家陣幾乎各大製造業重鎮，都有十幾二十間呢類新興公司開業。

由於唔少應急廠商都係短借來周轉，所以可以收得幾貴息，正規嘅小額貸款公司，依家借錢出去，都可以收到年息十厘以上，都咪話唔好搵。

凌通噚日同Joe傾過，佢話對小額貸款業務呢個市場極之看好，同佢個新東家廣州市花都萬穗小額貸款股份有限公司，都密密傾咗半年有多，大家係情投意合決定合作。佢仲話，就任萬穗董座之後，會香港、廣州兩邊走。不過，佢都話，未來仲會留任瑞銀顧問一職。

Joe對小額貸款呢個市場似乎真係好有興趣，前排佢先斥資3000萬元入股另一家香港上市公司中國金融國際（721），而呢家中金國際就喺年初時宣布，轉型力攻內地各類信貸服務。

講返張化橋，喺90年代尾時曾擔任瑞銀中國研究部主管一職，有中國第一分析師之譽，曾揭發歐亞農業業務作假，事件轟動市場，又批評格林柯爾管理層而惹上官非，敢言作風聞名業界。