袁天凡加盟對沖基金

Francis袁天凡【圖】係第一代華人投行高手，後來做咗李澤楷「軍師」，近來比較低調，甚少公開露面，只係偶然在中環食晏時見到佢。不過，大家咪以為佢老哥退隱江湖，凌通知道，佢已經決定出山重投金融界，加入一家大型對沖基金做主席。

Francis加入之基金名為泓策，英文名叫Ortus，係全球知名之對沖基金，管理資產超過20億美元，專長於G7外滙投資；旗下有個基金產品更加因為表現非凡，回報驚人而全球排名第十二，真係唔講得笑。更令基金界驚訝係，呢間Ortus的創辦人唔係老外，而係海歸中國人，以真正的戰績為華人爭光。

辭去電盈旗下職務

據知，Francis會擔任呢家Ortus之主席，好快就會搬去公司新近入伙的寫字樓正式返工。至於同8號仔電盈之關係，Francis已於本月辭去8號仔旗下所有職務，只保留8號仔母公司喺星洲上市的盈拓之非執行副主席一職。

講開Ortus，基金界老友就話創辦人周全（洋名Joe）係金融界甚為吃得開，客戶層面極廣，甚至包括有主權基金。

而且為咗打天下，Joe前排挖咗中國主權基金中投公司嘅一個董事總經理陸彪過檔，呢位老總陸彪之前喺中投主要負責管理對沖基金業務，同Joe係中學同學兼老死。老友仲話，Joe除咗擅長投資買賣，更加係高球高手，有在粉嶺同張連偉一較高下的能耐。Francis日後唔止多個同事，仲多咗個一齊揮桿的波友。